رئيس مجلس الإدارةإسلام فراج

الشيطان الأخرس

الشيطان الأخرس
2018-06-12 16:49:54

(حلقة جديدة من حلقات مصطبة الفيس بوك عنوانها)

( الشيطان الأخرس)

هى علشان مصطبة فلازم يكون الكلام بالبلدى مش بالعامية بس يعنى ناخد راحتنا على الآخر ونعيش لحظات حقيقية وكأننا قاعدين على المصطبة بنتكلم مع بعض وقدامنا براد الشاي وصنية الكوبايات مع تشغيل الراديو على إذاعة أم كلثوم نستمتع باغانيها الجميلة اللي بتاخذنا للذكريات الجميلة واللي عاشت معنا طول حياتنا وفى نفس الوقت بتاخدنا لمكان بعيد كله سحر وخيال ينسينا هم الزمان وهم الناس اللي بتعيش معانا فى نفس المكان ...
هنحكى حكاية بسيطة بتحصل معانا كلنا ولما تقرأوا السطور اللي جاية كل واحد فيكوا هيحس ان الكلام ده بيعبر عنه ولما يجيلك الإحساس ده ركز على الكلمتين بتوع النهاية
هنرجع للمصطبة؛
●الجزء الأول؛
الفيسبوك لما بدأنا نستخدمه كان الانترنت حاجة غريبة علينا مكناش فهنينه اوي وهو استغل عدم معرفتنا بيه ورغبتنا في اننا نتعرف عليه ودخل في وسطنا وفرض نفسه علينا كأنه واحد من العيلة ومع مرور الوقت والعشرة فهمنا انه بئى زي ما يكون فيرس ينتشر ويسير كمجرى الدم فى عروقنا حسينا كأنه الشيطان وعلشان كده تم تشبيه الفيسبوك بالشيطان الأخرس.

●طيب ليه شبهناالفيسبوك بالشيطان الأخرس؟؟
هقولك فى اجابة بسيطة إن معظم مستخدمي الفيسبوك تلاقيهم مترددين
مرة تلاقى واحد يقولك انا هخرج من الفيسبوك نهائيا وده لسبب ما والسبب طبعا بيبقى حاجه مش كويسة فيها سلبيات كثيرة واضرار اكيد لها تأثير سلبي عليه فتلاقيه يبعد شوية ويرجع تاني على طول مش بس كده دا لما بيرجع بيهتم بالفيسبوك اكتر من الاول وده اللي خلانا نقول عليه انه فيرس ولكن هو مش بس فيرس وانما فى نفس الوقت تحول إلى وسيلة إدمان للبشر لن يتم الاستغناء عنها فبالتالي التمسك به فظيع . فاللى بيحصل من الفيسبوك للانسان هو نفس اللى بيحصل من الشيطان للانسان الشيطان يغويك للطريق الخطأ وعندما تكتشف تقول اعوذ بالله من الشيطان الرجيم وتبتعد عن وساوس الشيطان بمواصلة الصلاة وعلشان انت عزيمتك ضعيفة فبترجع بسرعة لأخطاءك ولما يوسوس لك الشيطان مرة تانية وانت ضعيف بيسيطر عليك وبترجع لاخطاءك مرة تانية .
وعلشان كده شبهنا الفيسبوك بالشيطان فهما يسيروا معا فى نفس الاتجاه
ده جزء اول من حديثنا واحنا قاعدين على المصطبة
●الجزء الثانى ..
قالوا لنا ان الفيسبوك ده تواصل اجتماعى يقرب البعيد ويفكرك بالذكريات ويوصلك باصدقاءك القدامى اللى ممكن تكون بئالك سنيين متعرفش عنهم حاجه وفجأة من خلال الفيسبوك تلاقيهم صدفه وبدأت فى التواصل معاهم ده شيئ جميل جدا ولطيف أووى وهو من مميزات الفيسبوك
لكن تعالى نشوف بعدما تواصلت مع صديق مشفتهوش ولا سمعت اخباره من مدة طويلة ولما قابلته كنت سعيد جدا انك قابلته تانى 
ساعات بتصادف ان صديقك ده بعد الفترة الكبيرة من الزمن اللى فرق بينكم تلاقيه حالتة كويسه وميسور الحال ووصل لمنصب كويس فتحاول انت أنك توطد علاقتك بيه علشان مصلحتك وخصوصا انه صديق الأمس فتفضل تدوشه وتكلمه كل شوية علشان تلاقي طريق تتواصل معه يمكن تحصل على مصلحة من خلاله ولكن عندما يتجاهل هذا الصديق لطلبك وامنيتك فتبدأ بتقليل السؤال عليه بل يصل بك الامر بعدم السؤال من اساسه وبعد فترة ممكن تمسحه من عندك ماهو فى الاخر مفيش منه فايدة يبقى هتسيبوا على صفحتك ليه .نفس الشئ عندما تعلم حقيقة شخص آخر وهو صديق قديم لك وتكتشف قلة الحيلة وانه محتاج مساعده تقوم انت متجاهل كل هذا حتى العشرة القديمة ومش بعيد تعمل بلوك له ماهو طلع محتاج وانت أساسا محتاج اللى يساعدك
●الجزء الثالث .
لما انت بتفتح الفيسبوك
طول اليوم بتبقى عادى ومبسوط وفرحان ان كل كلمه بتكتبها لها كومنتات وتعليقات وفرحان بنفسك اوى ومقضى معظم وقتك على الفيس بوك
وسايب اولادك وزوجتك هما فى حال وانت فى حال فتبدأ حياتك وأنت بتبتعد عنهم شوية شوية لغاية ما تجهل كل مايدور بحياتهم ولو بالصدفة وجدت زوجتك او اى حد من اولادك قاعد ع الفيسبوك ويتصفح فيه تنهار عليهم غضبا وتمنعهم من حق استخدام الفيسبوك مثلك تماما حينها يقال عليك بأنك طماع وانانى فلماذا تستخدم هذا وتحرمهم منهم ولماذا تغضب منهم من استخدامه هل انت مقتنع بانه شيطان يعيش بداخلنا طيب طالما انت مقتنع امنع نفسك منه اولا وبعد ذلك عاتب اولادك وامنعهم أيضا وده طبعا شبه مستحيل لان زى ماقولنا ده ادمان سيطر على كل حركه فى جسم الانسان
الجزء الرابع 
من أحاديث قاعدة المصطبة البلدى برضوا إنك لما بتروح مكان وتفضل فيه فترة معينه بتتعرف على اصدقاء عمل دراسة اى نوع المهم طول ما انت معاهم وقاعد جنبهم وكل واحد فاتح صفحته بتجاملوا بعض كل اللى يكتب حاجه على طول لايك او كومنت مع العلم بأنكم ليل ونهار مع بعض وكل واحد بيحاول يعبر للتانى عن مدى اعجابه بما ينشره صديقه 
تعالى بقه لما يتفرقوا وكل واحد يروح مكان وعلشان الفيسبوك
بيقولوا عليه تواصل اجتماعى يبئى المفروض التواصل بعد الفراق يكون اشد مش كده ولا إييييييه؟
طبعا مفيش الكلام ده انت بتتنقل وتروح مكان تانى وبعد فترة قصيرة مبتشوفش الناس اللى كانت معاك فى نفس المكان وكانوا على طول بيعلقوا على بوستاتك اصلا مفيش منهم حتى لايك ما هو انت خلاص يامعلم سيبتهم ومشيت وتشعر كأنك ميت وانت عايش بالحياة..
ايه الفرق بقه ياجماعه بين وجود الفيسبوك
فى حياتنا من عدمه أصلا انا مشيت او انت مشيت وابتعدنا عن بعض خلاص تقفل الصفحة وتغلق حتى صفحات الرسائل بيننا يبقى فين التواصل والسؤال والود والوصال مفيش فرق بين انك تعيش حياتك الطبيعية بدون فيسبوك او بوجود الفيسبوك
واعتقد طالما الحياة هتفضل كده على طول يبقى بلاش فيسبوك لانه مكلف وتقوم بتوفير هذه التكاليف للاستعانه منها فى أمورنا أفضل من إهدارها على الفيسبوك
بدون اى فايدة
الجزء الخامس

إنقلبت صفحات الفيسبوك الى صفحات الوفيات زي ما كانت فى جريدة الجمهورية والاخبار ياجماعه هنصرخ ونقول دى صفحة تواصل اجتماعى مش وافيات ما هو نتواصل يعنى نطمئن على بعض نتحاور فى أمور سياسية فنية ثقافية دينيه رياضية اقتصادية المهم نستفيد منها جميعا.
وجدنا ايضا سباب وكلام خارج مينفعش يبقى علنى كده قولنا ده تواصل فى الفكر والادب علشان نتعلم ازاى نواجه مشاكلنا وازاى نتعامل بكل ادب واحترام مع بعض ولكن سرعان ما نواجهة الفاظ خارجة ومشينه تؤذى الجميع فما ذنب ابنتك او زوجتك او والدتك ان تقرأ هذا الكلام السيئ الشنيع الذى لا يعرف أخلاق ولا قيم.
ياجماعه الفيسبوك
تواصل باحترام وليس تواصل بالسب وقلة الاحترام
الجزء السادس ؛
الحقد وكثرته بسبب الفيسبوك نعم كثر الحقد والغل والنميمه والغيرة بين صفحات الفيسبوك الشيطانى فانت تمتلك خمسة آلاف عضوا ياترى تقدر تطلع منهم من يحبك ومن يكرهك؟؟؟
نعم تقدر فهناك البعض منهم القليل جدا يهتم بك وبكلامك ويجتهد على ان يساعدك لتظهر الى النور لانه معجب بك وباعمالك ولكن كم عدد الذين يعجبون بصفحتك ومنشوراتك وشخصيتك هم كاعداد صوابع اليد نعم قلة قليلة من بين خمسة الاف شخص يتمنون لك الخير واكثر من اربعة الاف منهم من لايهتم بك بسبب عدم وجود مصالح مشتركة بينكم ومنهم من
يحقد ويكره وينم فى شخصك حتى يشوة ويسيئ لسمعتك
قعدتنا طويلة اووى على المصطبة ولكن كان لازم نتكلم ونفتح قلوبنا لبعض ويكون كلامنا بالطريقة العامية علشان الكل يحس انه كان قاعد معانا على المصطبة وقد قمت بتشبيه الفيسبوك بالشيطان الأخرس لانه مسيطر علينا جميعا.

كلام كله تناقض تقرأ الموضوع من اوله تحس فعلا ان الفيسبوك ده ملوش اى لازمة وشيئ غريب مخرب فى حياتنا شيطان فعلا.

ولما تكمل المنشور وتوصل للجزء الأخير فيه تحس ان الفيسبوك ده ملاك وبيوصلك لهدفك وبيساعدك على التواصل بين البعيد والقريب وانك من خلاله تقدر توصل لقلوب الناس وتعمل صدقات جديدة مفيدة ومهمه فى حياتك وممكن تتعلم منه حاجات كتيرة تقدر تنجح من خلالها ايضا فى اثبات نفسك ..

تناقض رهيب ياجماعه بنشوفه على صفحات الفيسبوك منا من يكره الفيس ويبتعد عنه لفترات ثم يعود اليه مرة ثانيه ومنا من يعشقه ويدمنه ويشعر بأن الوصول للاحلام من خلاله.

طبعا قوانين المصطبه بتقول أن النظرية دى خاطئة
فمصطبة الفيسبوك بتقول بإختصار شديد

لا تسير وراء وساوس الشيطان وعليك أن تسير وراء الخير
وعليك أن تعى تماما ماهو طريق الخير حتى تعكس رؤيتك فى تشبيه الفيسبوك الى شيطان أخرس فالتغلب على هذا يعود لعزيمتك وفهمك وحسن تعاملك مع الطريقة الأمثل فى إستخدام هذا السلاح الخطير جدا على حياتنا فاما ان يكون سلاحا يحمينا ويحافظ علينا أو سلاحا يدمرنا ويقضى علينا.

إنتهت جلسة المصطبه

أُضيفت في: 12 يونيو (حزيران) 2018 الموافق 28 رمضان 1439
منذ: 3 شهور, 7 أيام, 9 ساعات, 59 دقائق, 7 ثانية
0
الرابط الدائم

التعليقات

77403

راديو القمة

radio
البنك الأهلي المصري إعلان
القمة نيوز

استطلاع الرأي

هل تتوقع نجاح خطة وزارة الزراعة فى الحد من ارتفاع أسعار السمك؟
البنك الأهلي المصري
البنك الأهلي المصري
جميع الحقوق محفوظة 2017 © - القمة نيوز