أنا عمرى مانسيته أبداً بس النهارده كنت محتجاله قوى كلمته .. سألته ممكن أجيلك بيتك

محتجالك قوى ووحشني ونفسي أتكلم معاك ممكن تسمحلي أجيلك شويه قلبي في حزن كبير ومحدش حايفهمني غيرك وماليش حد في الدنيا دي من بعدك ومحدش حايريح قلبي الا انت ممكن أجي ؟!!!

وطبعا كالمعتاد كان كريم وسمحلي وقالي تعالي مع أني مقصره في حقه جداً بس هو دايما يسامحني .

عندى إحساس فظيع انه بيحبني لانه عمري من يوم ما عرفته وحبيته ما خزلنى أبدا طبعا طيرت من الفرحة انه وافق أنى اروحله وبقيت بجرى اخلص كل اللي ورايا علشان متأخرش علي ميعاده ونزلت ورحتله وطبعا كالمعتاد كان استقباله جميل وهادى الهدوء اللي يوصل لقلبك في الحال.

واخدت في شنطتى الهدوم اللي دايماً بيحب يشوفني بيها وقبل ما أخبط على بابه لبست الهدوم الجميله دي وكأني عروس يوم فرحها وللحظه نسيت الهم اللي جوايا وحسيت بالفرحة وكان سايبلي باب بيته مفتوح زى دايماً ما بيعمل معايا

واستأذنت ودخلت وكان استقباله جمييييييل وحيته وقعدت قدامه اشكره انه ادانى الفرصة دى واتكلمت معاه واشتكيتله من كل حاجه مضيقاني وبكيت بس بكاء هادى وغريب وكأن كل دمعه بتنزل من عيني بتهدى حته من قلبى!!

وشرحتله قد ايه محتجاله وقد ايه الدنيا وحشه وقد ايه وحدتي واعتذرت له علي تأخيري عليه وبرغم انه حاسس بكل اللي في قلبي ومش مستني اشرحله بس سابني أتكلم علشان ارتاح.

اااه أقد ايه جميل ورحيم وعرف ازاى يخليني أرتاح وعرف ازاى يبرد قلبي وشكرته قوي علي الوقت الجميل اللي قضيته معاه وانه مارفضنيش ضيفه عنده وقت ماطلبت وطلبت منه انه يسمحلي أزوره تاني ووافق .

اااه أقد أيه بحبه وماسواش حاجه من غيره وبعد كده أعتذرت منه علشان ماكنتش قادره أتأخر اكتر من كده وكان لازم امشي بس بعد ما أخدت وعد منه بالزيارة مره تانيه أو بالأصح مرات تانيه .

بجد شكرًا يا حبيبي يا الله يا رحمن يارحيم انت الكريم اللي أبداً ما تقفل بابك في وش محتاج !!!

شكرًا لك ياربي علي استضافتك لي اليوم .