القمة نيوز تحاور مصممة الهاند ميد سمر علي و نتناول رحلة انتقالها الغير متوقع من الصحافة الي تصميم الازياء و من الكتابة بالقلم الى الرسم بالفرشاة و من العزف بالكلمات ل النقش على الجلود و تطريز العبايات .

في البداية عرفي نفسك للقاريء و الجمهور :

- أنا سمر علي خريجة كلية الأداب قسم لغة عربية و عملت لفترة فى الصحافة لحبى الشديد للكتابة والقراءة وبعد الزواح تفرغت لرعاية البيت والاسرة وتركت العمل الصحفى ولكن ذهبت الى هواياتى القديمة الرسم وتشكيل لوحات من المعادن وصهر الشموع والحفر عليها .

كيف بدأت معاكي موهبة الرسم على الأزياء و على المصنوعات الجلدية ؟
- كانت البداية منذ سنتين بدات بالرسم على ملابسى وتجربة العديد من انواع الالوان والادوات الخاصة بالرسم على الازياء بعد ان انقنت فن البورتريه فى البداية باخد بعض الكورسات ثم اتجهت الى تجربة الالوان على القماش .

كلميني عن أول ظهور ليكي في معرض خاص بشغلك
- اول ظهور ليا كان فى معارض للرسم منذ سنة واعجب بيها الجميع وده اللى شجعنى انى اكمل واطور من شغلى اكتر ودايما بحاول ابحث عن كل جديد واطور من نفسى حتى اتجنب التقليد .

تجربتك الصحفية أثرت ازاي علي مهنتك الجديدة ؟
ساعدتك في ايه الصحافه في مهنة الرسم على الأزياء والأحذية و الجلود؟
جميل السؤال ده جدا الصراحة -
اكيد الصحافة مهنة جميلة واثرت فى فنى بالايجاب لان عملى بالصحافة علمنى اقرا كتير ووفى حالة بحث مستمر عن الجديد والاصدق والافضل وده طور من فنى وشغلى كتير لانى دايما بابحث فى مواقع الانترنت العالمية الخاصة بكل انواع الرسم والفنون وقراءة الكتب الاجنبية عن اشهر الفنانين ومعرفة اسالبيهم الخاصة اللى استخدموها فى فنهم وده ساعد على تطورى سريعا
و علمتني سهولة البحث عن المعلومه ، استغلال قطاع عريض من العلاقات العامه و الشخصية اللي كونتها في فترة عملي الصحفي ، اتعلمت فن و احتراف التسويق و اكيد الصحافة ممكن اقول عليها بداية الابداع في مشواري .

حلمك توصلي لحد فين بفن الازياء ؟
اكيد حلمى اوصل للعالمية بخط ازياء مميزة تحمل الطابع المصرى فى التصميم والرسم- 
واهم شى يكون بعيد عن التقليد لان للاسف الكل اصبح نسخ مكررة .

ايه الخط اللي ناوية تشتغلي عليه
الخطة اللي هتشتغلي عليها للوصول بالتراث المصري ل العالمية ؟
دائما ما أعمل على الازياء التي تحمل طابع مصرى من حيث التصميم والرسم عن البيىة المصرية البدوية كثيرا ما يلفت نظر الخارج وده لاحظته من تعاملى من بعض الشعوب وتصدير شغلى ليهم .

ايه اكتر المنتجات اللي لاحظتي انها بتعجب الجمهور و بتلاقي اقبال شديد؟
فيه منتجات كتير قمت بتصنيعها لاقت تشجيع كبير من الجمهور زى العباية الرمضانية والشنط بالاكسسوار الخاص بها من الجلود والاخشاب يحمل نفس تصميم الشنط
ايضا التيشرتات الصيفية المرسومة بالرسومات الكارتونية مطلوبة ولاقت تشجيع .

فيه حد من اطفالك عنده نفس موهبتك ؟
كنت اتمنى ولكن الاولاد عشقهم الاول والاخير الساحرة المستديرة 
لكن عندهم حس فنى بيساعدونى كتير فى التشجيع وباخد رأيهم جدا وبافرح باختيارتهم اكيد .

لو رجع بيكي الزمان للخلف هتشتغلي صحفيه ولا رسامه ؟
سؤال يستحق التفكير 
ولكن.. الرسم معى منذ الطفولة يساعدنى على تخطى الازماات والرسم ابداع فانا اعترف انى متميزة ولابد من اختيار طريق مميز غير الكتابة فالرسم بالنسبة لى حياة .

عندك مكان ثابت بتعرضي فيه شغلك ..
و لا شغالة ع التسويق الالكتروني ؟
حتى الان اعتمد على التسويق الالكترونى واسعى الى تأسيس جاليرى خاص بعملى .

كلميني عن كل ما يلهمك و يداعب خيالك و يجعلك في حالة ابداع ؟
انا عايشة فى حالة الهام وابداع مستمرة زى ما بيقولوا الفنانين مجانين-
انا ممكن اكون ماشية فى اى مكان عادى واشوف اى منظر عادى بس انا باشوفه بنظرة مختلفة ممكن يكون الهام ليا لعمل جديد فعلا

مين اول شخص اكتشف موهبتك الفنية؟
والدى كان السبب فى اكتشاف الموهبة وكان بيشجعنى دايما انى ارسم لوحدى من غير اى مساعدة واحببت الرسم والفن عن طريقه
منذ ان كان عمرى ٦ سنوات .

و انتي طفله كان حلمك تكوني ايه لما تكبري ؟
حاجات كتير 
مضيفةطيران .صحفية.وظابط شرطة والحمد لله حققت حاجة منهم لحبى للقراءة ونجحت فيها فعلا والى الان اكتب بعض المقالات والخواطر ولكن احتفظ بها لنفسى .

و سؤالنا الأخير في ختام حوارنا 
كلمينا عن دور الأسرة في نجاحك و كلمة أخيرة توجهيها لمين .؟
الاسرة كان ليها دور كبير فى نجاحى شجعونى بكل طاقتهم والدى ووالدتى واخواتى سعداء جدا بنجاحى ووصولى للمستوى ده فى شغلى وليهم الفضل الاكبر بعد ربنا فى النجاح ده
كلمة اخيرة باحب اوجهها لكل الناس اللى وقفوا جانبى وساندونى ومهدولى الطريق الاهل واصدقائى وزوجى وباهديلهم نجاحى