في لحظة واحدة ..

وبكلمة شاردة ..

إفترقت لإيدينا

وابتدينا نبعد

وابتدينا نتوه

وابتدت تبان دمعة ف عينينا

يا هلترا كنتي قاصدة

ولاً انا اللي كنت قاصد

ولاّ الزمان ضحك علينا

دلوقتي آدينا بنفترق

ورسايلنا القديمة بتتحرق

والبحر نادهنا للغرق

والسفينة ..

تايهة السفينة

إيه اللي غيّرنا كدا

‘يه اللي كسّرنا كدا

يا حبيبتي إيه اللي بينا

إحنا اللي كنا الغناوي

واحنا اللي كنا الخطاوي

واحنا اللي كنا الحكاوي

إتغيّرت ليه معانينا

وازاي دلوقتي ما شيين بنبكي

وازاي دلوقتي نايمين بنبكي

وكل ما بنبكي بنبكي

والدمعة دايماً ساكنة فينا

شىء غريب مالي الشوارع

اللي تايه واللي ضايع

واللي رايح واللي راجع

والخطوة تعبانة وحزينة

كل الوشوش متغيّرة

كل الملامح متحيّرة

والمشاعر متكسّرة

ومقفولة أبواب المدينة

وانتي وانا ...

ماشيين بنندم عاللي فات

ماشيين بنندع ذكريات

ولا حدّ بيردّ علينا

في لحظة واحدة

وبكلمة شاردة

يا حبيبتي إفترقت إيدينا